BUWAN NG WIKA 2014: Filipino Wika ng Pagkakaisa

KWF

Kasabay ng pagpasok ng buwan ng Agosto ngayong araw ay ang umpisa rin ng selebrasyon para sa Buwan ng Wika.

Ang lalawigan ng Batangas ang pinili ng Komisyon sa Wikang Filipino (KWF)  bilang lugar  ng paglulunsad ng isang buwang selebrasyon na may temang “Filipino: Wika ng Pagkakaisa”.

Iba’t ibang aktibidad  rin ang ilulunsad ng Department of Education katuwang ang mga  paaralan sa bansa upang ipagdiwang ang Buwan ng Wika 2014.

Mula Agosto 1 hanggang 2 ay magsasagawa ang KWF ng pagsasanay sa Batangas tungkol sa paggamit sa Filipino bilang Korespondensiya Opisyal.

Ito ay bilang pagtalima sa Executive Order 335 na nagtatakda na gamitin ang wikang Filipino sa mga opisyal na korespondesiya at komunikasyon sa lahat ng sangay ng pamahalaan.

Sa darating na Lunes naman Agosto 4 ay gagawin ng KWF ang pagtataas ng watawat ng bansa sa Malacañang kasama ang panauhing pandangal na si Kalihim Sonny Coloma ng Presidential Communication and Operations Office.

Nakatakda ring ilunsad ng KWF sa Agosto 15 ang “Aklat ng Bayan”  sa Pambansang Museo ng Pilipinas.

Ayon sa KWF, ang Aklat ng Bayan ay serye ng publikasyon na inilalathala nila na naglalayong maipamahagi sa mga Pilipino ang mga napapanahon, wasto, at mahahalagang kaalaman at pagpapahalagang Filipino.

Layunin rin umano nitóng maglathala ng mga katangi-tanging saliksik at mga likha na magtatampok sa paggamit ng Filipino bilang wika ng karunungan.

Sa bisa naman ng DepEd memorandum 63 S2014 ay inilabas nito ang mga magiging gabay ng bawat paaralan para sa pagdiriwang ng buwan ng wika.

Nagtalaga ang kagawaran ng apat na tema para sa bawat linggo ng Buwan ng Wika. Kabilang rito ay ang mga temang  Ang Wika ng Usaping Pangkapayapaan ay Wika ng Pagkakasundo, Ang Wikang Nauunawaan ng Nakararami ay Wika ng Kapayapaan, Ang Wika ng Pagsasalin ay Wika ng Pagkakaunawaan, at Ang wika ng Kapayapaan ay Wika ng Pambansang Pagkakaisa.-DCR

 

Advertisements